Parlementslid aangehou wat sê Mugabe is gay
2011-12-29 17:31
Harare – 'n Zimbabwiese parlementslid is sewe dae aangehou nadat sy gesê het pres. Robert Mugabe het gay seks met 'n ander politikus gehad, het die staatsmedia Donderdag berig.
Die staat het Lynette Karenyi van die Beweging vir Demokratiese Verandering (MDC) daarvan beskuldig dat sy gesê het "Robert Mugabe, president van Zanu-PF, het homoseksuele seks" met 'n ander politikus gehad, het The Herald berig.
"Karenyi het na bewering pres. Mugabe beledig terwyl sy MDC-lede op 9 Desember by 'n byeenkoms by die Nhedziwa-sokkergronde in Chimanimani toegespreek het," het die koerant berig.
Mugabe, wat daarvoor bekend is dat hy al gesê het gays en lesbiërs is "erger as varke en honde" het verlede maand na die Britse premier David Cameron verwys as "satanies" omdat hy gesê het lande wat hulp van Londen wil hê moet gay regte aanvaar.
Karenyi en haar party het nie kommentaar gelewer nie, maar die koerant het gesê sy "ontken die aantygings wat teen haar gemaak word."
Sy is Donderdag op borgtog vrygelaat ná sy 'n bedrag van $200 (sowat R1 630) betaal het.
– Volg Nuus24 op Twitter.
- Sapa - AFP