Ouattara gee ministers 6 maande
2011-07-07 15:26
Abidjan – Alassane Ouattara, die president van die Ivoorkus, het Woensdag sy ministers ses maande kans gegee om 'n daadwerklike verskil te maak in hul posisies ná die gewelddadige verkiesingskrisis wat die land geruk het.
Ouattara sukkel om wet en orde te herstel en om die Ivoorkus se ekonomie weer op dreef te kry nadat ‘n magstryd met Laurent Gbagbo, die voormalige president, die land in ‘n burgeroorlog gedompel het.
Die president was vir die afgelope twee dae in vergaderings met sy ministers om te besluit wat die top-prioriteite vir die volgende ses maande gaan wees.
Die herstel van sekuriteit en basiese dienste was tydens ‘n toespraak wat hy Dinsdag gelewer het, bo-aan die lys.
“Die belangrikste ding vir my is om te sien dat die aksies waaroor ons gepraat het, geïmplimenteer word en dat die parlementslede se werk geëvalueer word,” het Ouattara gesê.
– Volg Nuus24 op Twitter.
- Reuters