Osama 'het fortuin op heilige oorlog spandeer'
2012-06-04 19:05
Osama bin Laden, gevalle Al-Kaïda-leier, het sy fortuin op die "heilige oorlog" en die aanvalle wat op 11 September 2001 in Amerika plaasgevind het, spandeer, het die huidige Al-Kaïda-hoof, Ayman al-Zawahiri, in 'n internet-video gesê.
"Die ryk sjeik Osama... het al sy geld op die heilige oorlog spandeer," het Zawahiri, Bin Laden se nommer twee wat leiding van die djihad-groep oorgeneem het nadat die wêreld se mees gesoekte man in Mei verlede jaar doodgemaak is, gesê.
Amerikaanse troepe het Bin Laden verlede jaar op 2 Mei in Abbottabad, Pakistan, doodgeskiet.
Zawahiri se boodskap, wat op Islamitiese webtuistes gepubliseer is, is die tweede gedeelte van sy memoirs oor die lewe van Bin Laden.
"Hy het vrygewig op die djihad spandeer, veral op die finansiering van die 11 September-aanvalle op Amerika en die aanvalle teen die Amerikaanse ambassades in Nairobi en Dar es Salaam in 1998," het Zawahiri gesê.
Bin Laden se persoonlike lewe was egter eenvoudig en hy was "baie suinig om geld op enigiets anders as die djihad uit te gee".
Bin Laden, wat van 'n ryk familie gekom het, se welvaart is sowat tussen $30 miljoen (sowat R257 miljoen) en $300 miljoen (sowat R2 miljard).
– Volg Nuus24 op Twitter.
- AFP
