'Orals bloed' ná bom in Mogadisjoe
2011-11-23 10:12
Mogadisjoe – Altesaam 10 mense is Dinsdag dood in ‘n bomontploffing langs ‘n besige straat in Mogadisjoe, die Somaliese hoofstad, het die polisie en ooggetuies gesê.
“Daar was Dinsdagmiddag ‘n groot ontploffing in Wadajir. Die bom was langs die pad en ons hoor dat meer as tien mense in die ontploffing dood is,” het Abid Omar, ‘n Somaliese polisiebeampte, gesê.
“Ons probeer nog vasstel wie geteiken is, maar al die slagoffers was burgerlikes,” het hy gesê. ‘n Aantal mense is ook tydens die voorval beseer.
Volgens ooggetuies is daar ook kinders onder die slagoffers van die ontploffing, wat naby Jaygastraat gebeur het.
“Dit was ‘n verskriklike aanval. Ek het die lyke van minstens nege burgerlikes, insluitend kinders, gesien. Daar is orals bloed,” het Sadiq Mohamed, ‘n ooggetuie, gesê.
Intussen is drie burgerlikes in die suide van Somalië naby die grens met Kenia dood in ‘n lugaanval in Shebaab-beheerde omgewings.
“Twee militêre vliegtuie het die Yagle-dorp gebombardeer. Drie burgerlikes is dood en talle ander beseer,” het Moalim Abdulahi Mumin, ‘n stamleier in El Wak, ‘n stad op die grens tussen Somalië en Kenia, gesê.
“Die vliegtuie het talle bomme afgevuur. Twee van die bomme het ‘n put getref waar nomades water vir hulle vee gekry het. Die meeste van die slagoffers was burgerlikes,” het Mumin gesê.
Sheikh Ibrahim Mohamed, ‘n streeksbevelvoerder van die al-Shebaab-rebelle, het die aanvalle bevestig.
– Volg Nuus24 op Twitter.
- AFP