Oorlogsmisdadiger se 'dae getel'

2012-05-17 07:36

Den Haag – Die hoofaanklaer van die internasionale strafhof (IS) het gesê hy is hoopvol dat 'n vermeende Kongolese oorlogsmisdadiger binnekort vasgetrek sal word, berig BBC.

Bosco Ntaganda word gesoek op aanklagte van misdade teen die mensdom.

Luis Moreno-Ocampo, IS-aanklaer, het gesê die Demokratiese Republiek van die Kongo (DRK) en Rwanda glo dat Ntaganda in hegtenis geneem moet word.

Die Verenigde Nasies het vroeër gesê duisende mense het weens die geweld in die DRK na buurstate gevlug.

Moreno-Ocampo het gesê daar is nou 'n groter konsensus oor Ntaganda se beweerde misdade as in 2006 toe die IS 'n lasbrief vir sy inhegtenisneming uitgereik het op aanklagte dat hy kindersoldate gebruik.

Hy het gesê dit is die Kongolese weermag se verantwoordelikheid om Ntaganda aan te hou en dat dié weermag die hulp van die VN en Rwanda kan versoek.

"Ek hoop dit is weke," het Moreno-Ocampo oor Ntaganda se inhegtenisneming gesê.

– Lees meer hier

– Volg Nuus24 op Twitter