'Oorlog in Darfoer verby'- VN
2009-09-04 10:18
Darfoer – Rodolphe Adada, die Verenigde Nasies (VN) se uittredende leier van die vredesmagte in Darfoer, het aan die inwoners gesê hulle moet van oorlogspraatjies vergeet nadat geweld en die getal sterftes in die afgelope jaar aansienlik afgeneem het.
Aktiviste en die inwoners van die land verskil egter van hom.
Dit het kommer onder die mense van Darfoer geskep in die sin dat daar, op internasionale vlak, minder gefokus mag word op die oorsprong van die probleme binne die oorlogsgeteisterde land.
Die VN-vredesmagte het ‘n skerp daling onder die getal sterftes weens geweld opgemerk.
Daar was slegs 16 sterftes gedurende Junie teenoor verlede jaar se 130 sterftes per maand.
"Ons kan nie meer praat van ‘n oorlog in Darfoer nie," het Adada aan AP gesê.
“Ek dink almal verstaan dit nou. Ons kan nie meer langer oor die kwessies praat nie,” het hy gesê.
Die konflik in Darfoer het in Februarie 2003 begin toe Afrika-rebelle in opstand teenoor die Soedanse regering gekom het.
Die oorlog het minstens 300 000 lewens geëis, het VN-amptenare gesê.
Sowat 2.7 miljoen mense is vanaf 2003 tot 2005 uit hul huise verjaag, het die VN bygevoeg en dié organisasie beskou dit as die wêreld se grootste humanitêre krisis ooit.
- Sapa-AP