Ontvoerde Brit siek met koors
2011-09-20 17:00
Mogadisjoe – ‘n Britse vrou wat in Somalië aangehou word nadat sy by ‘n Keniaanse strandoord ontvoer en haar man doodgeskiet is, ly aan stres en koors, het ‘n seerowerleier gesê.
“Ek is ingelig dat die gyselaar angstig en baie siek met koors is,” het Abdi Yare gesê en bygevoeg hy het met die ontvoerders vanaf sy seerowerlaer in Hobyo gepraat.
Judith Tebbutt, wat na verneem word gehoorprobleme het, is op 11 September op ‘n afgeleë strandoord naby die grens tussen Kenia en Somalië deur gewapende mans wat haar man doodgeskiet het, ontvoer.
“Sy ondervind ook probleme om met die ontvoerders te kommunikeer. Sy het vir ‘n foon gevra om haar seun en broer by die huis te bel,” het Yare gesê.
Tradisionele leiers in Amara, ‘n dorpie noord van Harardhere, Somalië, het Sondag gesê Tebbutt is van die boot waar sy deur seerowers aangehou is hierheen geskuif.
Amara is ook die dorp waar die Britse paartjie Paul en Rachel Chandler, wat in 2009 van hul seiljag ontvoer is, aangehou is.
“Die seerowers het die vrou nou na ‘n onbekende plek geneem en sal aanhou om haar te skuif sodat niemand hulle kan vind nie,” het Abdulahi Muhumad, ‘n leier in die Harardhere-streek, gesê.
“Daar is bykans twaalf gewapende seerowers wat die vrou aanhou,” het Gure Osman, nog ‘n gemeenskapleier, gesê.
– Volg Nuus24 op Twitter.
- AFP