Ontploffings ruk Nigeriese stad

2012-10-16 14:00

Lagos – ‘n Reeks ontploffings en geweerskote het ‘n gedeelte van Maiduguri in Nigerië geruk, het amptenare Dinsdag gesê.

“Ons kan op die oomblik nie sê hoeveel skade en slagoffers daar is nie, omdat die soldate die gebied afgesper het,” het  Mohammed Kanar, 'n regeringsamptenaar, gesê.

Die aanvalle het glo laat Maandagaand begin en tot vroeg Dinsdagoggend aangehou.

Maiduguri word die afgelope ruk geteister deur verskeie gewelddadige aanvalle. Die rebellegroep Boko Haram is glo verantwoordelik vir die aanvalle.

“Die Rooikruis en ander soortgelyke agentskappe het nie op die oomblik toegang tot die gebied nie,” het Kamar bygevoeg.

Op 8 Oktober is 30 burgerlikes doodgeskiet tydens ‘n militêre klopjag op Boko Haram-lede wat in Maiduguri wegkruip.

Aanvalle deur Boko Haram het sedert 2010 reeds die lewe van sowat 1 400 mense geëis.

– Volg Nuus24 op Twitter


 

- Sapa-DPA