Ontploffing eis drie rebelle
2010-02-22 15:13
Mogadisjoe – Minstens drie rebelle van die Islamitiese Shebab-groep is dood ná ‘n raaiselagtige ontploffing wat in Mogadisjoe plaasgevind het.
Die ontploffing, wat Sondag in die Hamarjadid-buurt van Mogadisjoe plaasgevind het, kon regoor die Somaliese hoofstad gehoor word.
“Daar was ‘n groot ontploffing in die Hamarjadid-area en ons het die lyke van drie mense op die toneel van die ontploffing gekry. Ons het nog nie hul identiteite nie,” het ‘n Shebab-beampte aan AFP vertel.
Volgens ‘n Hamarjadid-inwoner kan ‘n mens nie naby die toneel kom nie aangesien die Shebab die area afgeblok het.
Die oorsaak van die ontploffing is nog onbekend.
- Sapa-AFP