Onmin in Guinee-Bissau ná staatsgreep
2012-10-22 13:06
Bissau – Guinee-Bissau het die regering van Portugal, die Gemeenskap van Portugese Lande (CPLP) en Portugal se voormalige premier, Carlos Gomes Júnior, daarvan beskuldig dat hulle ‘n staatsgreep in dié land ondersteun.
Die beskuldigings volg na ‘n skietgeveg waarin minstens sewe mense dood is.
Gewapende mans het Sondagoggend 'n weermaggebou naby die hoofstad se lughawe aangeval.
Ooggetuies sê die aanval is deur kapt Pansau N'Tchama gelei. N'Tchama is die hoof van ‘n kommando-eenheid wat pres. Joao Bernardo Vieira in 2009 vermoor het.
Dit is nog nie duidelik waarom N'Tchama die aanval uitgevoer het nie, maar die kaptein is ‘n bondgenoot van die vorige regering, wat op 12 April deur ‘n staatsgreep ontsetel is.
N'Tchama het verlede week uit Portugal aangekom waar hy sedert 2009 militêre opleiding ontvang het.
Die weermag het tydens die staatsgreep beheer oor die land geneem en het ‘n oorgangsregering aangestel.
Die staatsgreep het die regering van die voormalige premier, Carlos Gomes Junior, omver gewerp.
“Die regering hou Portugal, die CPLP en Carlos Gomes Junior verantwoordelik vir die aanvalle wat mik om die land te destabiliseer,” het Fernando Vaz, minister van kommunikasie, gesê.
– Volg Nuus24 op Twitter
- AFP
