Obama se ouma in ongeluk beseer
2012-02-06 21:01
Kenia – Pres. Barack Obama se 91-jarige stiefouma het kneusplekke en skok opgedoen nadat die motor waarin sy gereis het omgeslaan het, het 'n familielid en hospitaalbeampte Maandag gesê.
Volgens die familielid was Sarah Obama op pad na haar huis in die dorp Kogelo, wat in die westelike deel van Kenia geleë is, toe die ongeluk Saterdagaand plaasgevind het.
Hy het gesê die voertuig het buite beheer geraak toe die bestuurder probeer het om 'n vragmotor naby die lughawe in Kisumu verby te steek.
Die familielid het gevra om nie genoem te word nie, omdat hy nie toestemming het om namens die familie te praat nie.
Najim Mawji van die Agha Khan hospitaal in Kisumu het gesê dokters het Sarah Saterdagaand ontslaan nadat sy verskeie toetse ondergaan het.
Sarah is Obama se oupa se tweede vrou.
– Volg Nuus24 op Twitter.
- Sapa - AP