Nuwe era in Somalië, sê Clinton

2012-09-12 12:38

Washington – Die VSA het die nuwe president van Somalië gelukgewens en die hoop uitgespreek dat die verkiesing van Hassan Sheikh Mohamud 'n nuwe era vir dié Afrika-land sal verteenwoordig ná twee dekades van onstabiliteit in die land.

"Ek wil pres. Hassan Sheikh en die mense van Somalië gelukwens," het Hillary Clinton, die Amerikaanse minister van buitelandse sake, in 'n verklaring gesê.

Met Maandag se verkiesing van 'n nuwe president, het Somalië sy politieke oorgang voltooi, het Clinton gesê.

Die Withuis het intussen ook sy gelukwense aan die mense van Somalië gestuur.

Mohamud, 'n 56-jarige universiteitslektor wat nie juis buite sy land bekend is nie, is uit talle hoopvolle kandidate deur wetmakers as Somalië se nuwe president gekies.

Clinton het in haar verklaring bygevoeg dat daar steeds baie werk is wat gedoen moet word.

– Volg Nuus24 op Twitter.

- AFP