'Nuwe begin' vir Kenia ná referendum oor grondwet
2010-08-06 08:59
Beeld
Nairobi. – “’n Nuwe dag het vir Kenia aangebreek,” sê Uhuru Kenyatta, seun van wyle pres. Jomo Kenyatta, die man wat dié land tot onafhanklikheid gelei het.
Die jong Kenyatta het die oorwinning van die ja-stem (69%) in eergister se referendum oor ’n nuwe grondwetlike bestel ook as die “geboortedag van Kenia se Tweede Republiek” bestempel.
Die vrede en die orde wat in die referendum geheers het, het Donderdagaand nog gehou. Daar is egter reeds tekens dat die debat en die gevolglike onderliggende spanning oor die nuwe grondwet nie verby is nie.
Hoewel William Ruto, leier van die verslane nee-kamp (31%), sy nederlaag “in belang van die hele Kenia” aanvaar het, eis hy dat die oorblywende geskille oor die nuwe grondwet “dringend” heroorweeg word.
“Meer as 30% van die 12,2 miljoen geregistreerde kiesers het teen die grondwet gestem. Tussen 35% en 40% van kiesers het buite stemming gebly.
Dit beteken dat die grondwet net deur ’n minderheid bekragtig is,” het Ruto, een van vyf kabinetslede wat ’n nee-stem bepleit het, aangevoer.
Die stempersentasie word op 58% geraam.
Ruto het hom in die veldtog toegespits op die plofbare Groot Rif-provinsie, die enigste van agt provinsies waar die nee-stem (73% teenoor 27%) gewen het. Geweld het in drie van die afgelope vier verkiesings in dié provinsie uitgebreek.
Met die Rif-provinsie (met 3,2 miljoen kiesers) as basis het Ruto Donderdag aangedui dat hy hom in 2012 as presidentskandidaat beskikbaar gaan stel.
Aangesien pres. Mwai Kibaki voor 2012 gaan aftree, is Ruto volgens ontleders nou premier Raila Odinga se sterkste teenstander. Waarnemers sê die jong Kenyatta is ook gereed om hom verkiesbaar te stel.
Prof. Yash Pal Ghai, wat betrokke was by die skryf van die nuwe grondwet, het gesê dis onvermydelik dat die geskille wat in die referendum na vore gekom het – grondeienaarskap, aborsie en Islamitiese howe – die politieke debat tot die verkiesing in 2012 sal oorheers.