Nóg ‘n Soedannese koerant word gesluit
2011-09-28 18:02
Kartoem – Soedannese veiligheidsbeamptes het Dinsdag die onafhanklike Al-Jarida-koerant gesluit, het die koerant se redakteur aan AFP gesê.
Volgens regtegroepe is dit die jongste in ‘n vlaag van politiese onderdrukking in die media in dié land.
“Veiligheidsbeamptes het na die gebou gekom en ons ingelig dat daar besluit is dat veiligheidsmagte alles wat aan die koerant behoort, in beslag gaan neem,” het Saad al-Din Ibrahim gesê.
Die veiligheidsmagte het die personeel beveel om die gebou te verlaat en het dit gesluit. Daar is geen rede vir hulle optrede aan die personeel verskaf nie.
Soedan se intelligensiediens het ‘n reputasie daarvoor dat hulle koerante in die middel van die nag besoek en dan eis dat sekere artikels nie gepubliseer word nie.
– Volg Nuus24 op Twitter.
- Sapa - AFP