Nog ‘n Gaddafi-seun in Niger
2011-09-12 16:09
Niamey – Saaido Gaddafi, een van Muammar Gaddafi, die ontsetelde Libiese leier, se seuns, het Sondag in Niger aangekom, het ‘n regeringswoordvoerder gesê.
“Op 11 September het ‘n patrollie van Nigerynse gewapende magte ‘n konvooi voorgekeer. Een van Gaddafi se seuns is in dié konvooi gevind,” het Marou Amadou gesê.
Dit was Saadi Gaddafi, “die sokkerspeler”, het Amadou, wie ook die Nigerynse minister van justisie is, gesê.
“Op die oomblik is die konvooi na Agadez, in die noorde van Niger, op pad. Hulle behoort of Sondag of Maandag daar aan te kom,” het hy gesê.
Saadi (38), die derde van Gaddafi se sewe seuns, word as ‘n rokjagter beskryf en het sy sokkerloopbaan laat vaar en in 2004 by die weermag aangesluit, waar hy die bevelvoerder van ‘n elite-afdeling was.
Niger het Vrydag beloof om internasionale ooreenkomste na te kom as gesoekte Libiërs die land binnekom.
– Volg Nuus24 op Twitter.
- Sapa - AFP