Nigeriese troepe fnuik aanval
2010-04-20 03:38
Jos – Die weermag in Nigerië het twee beweerde Moslem-ekstremiste doodgeskiet wat glo ‘n aanval op ‘n Christelike dorp beplan het, het die weermag gesê.
Dié twee het glo beplan om die dorp Bisichi aan te val, wat aan die rand van Nigerië se Plateau-staat geleë is. Hulle plan is egter in die wiele gery deur ‘n militêre taakspan wat in die omgewing ontplooi is.
“Indien die twee mans voortgegaan het met hul plan, sou dit ‘n groot terugslag vir ons gewees het. Gelukkig het die taakspan vinnig gereageer en die twee doodgeskiet,” het Brig. Gen. Donald Oji in ‘n verklaring gesê.
Jos, die hoofstad van die sentraal-Plateau-staat, is die afgelope tyd geteister deur geweld.
Dit wil voorkom asof die aanvalle uit weerwraak is vir vorige geweld deur die Moslem-Fulani’s. Dié etniese groep het in Maart vyf aanvalle op Christen-dorpe geloods, en meer as 500 mense se lewens geeïs.
- AFP