Nigeriese regering moet met sekte praat – komitee
2011-09-27 16:00
Abuja – Die Nigeriese regering moet met ‘n Islamitiese sekte onderhandel oor aanvalle, insluitend die bombardering van die VN-hoofkwartiere, het ‘n komitee wat deur die president aangestel is Maandag gesê.
Die gesprekke moet egter gedoen word op voorwaarde dat die gewapende magte afstand van geweld doen.
Die komitee, wat sowat twee maande gelede gestig is, het dié voorstel in sy jongste verslag gemaak. Die verslag gaan oor onveiligheid in die land se noordooste, waar die sekte, bekend as Boko Haram, die meerderheid van sy aanvalle uitvoer.
“Die regering moet die opsie van dialoog en onderhandeling oorweeg, met die neerlegging van wapens en die afstand neem van geweld as voorwaardes...” het Usman Galtimari, die hoof van die komitee, gesê.
Daarna moet ‘n rehabilitasieprogram volg, het hy gesê.
– Volg Nuus24 op Twitter.
- Sapa - AFP