Nigerië: Situasie steeds vlambaar
2012-01-17 07:01
Pretoria – ’n Gespanne stilte het Maandag in Nigerië geheers met die aanbreek van die tweede week van geweld oor die afskaffing van brandstofsubsidies.
Buitelanders is deur sekuriteitskenners daar gemaan om twee keer te dink voordat hulle die land besoek aangesien vlugte na en van veral Lagos “sporadies” is.
Nigeriese burgers in Suid-Afrika het terselfdertyd gister na die land se ambassade in Pretoria gemarsjeer om die brandstofprobleem, sowel as die regering se beweerde onvermoë om die bedreiging deur Moslem-ekstremiste vas te vat, in die kollig te plaas.
Volgens Chidozie Ejimadu, sekretaris-generaal van die Imo-vereniging van Nigeriese organisasies in Suid-Afrika, is die tekortkominge van die regering om bedreigings en korrupsie die hoof te bied, onhoudbaar.
Meer as 40 mense is op Kersdag verlede jaar dood nadat die terreurgroep Boko Haram kerke en Kers-byeenkomste aangeval het.
’n Swaar militêre teenwoordigheid was Maandag in die strate en toevoerroetes na Lagos sigbaar met padversperrings op dié roetes en by vergaderplekke van oproeriges.
“Ons bly steeds uit die strate uit en probeer so min moontlik rondbeweeg,” het ’n veiligheidspesialis van Suid-Afrika, wat in Lagos werk, gesê. “Almal wag nou om te sien hoe die vakbonde reageer op die president se toespraak op televisie,” het hy gesê.
Voor die staking is die stad se inwoners gemaan om genoeg kos en voorrade te koop sodat hulle nie winkels toe hoef te gaan nie.
Pres. Goodluck Jonathan het in ’n uitsending vir die volk aangekondig dat hy die brandstofprys sal verlaag. Die onluste het juis uitgebreek nadat die regering die brandstofsubsidies afgeskaf het.
Dit sou beteken dat die prys meer as verdubbel het. Jonathan het gesê die regering gaan die verhoging halveer.
Verskeie mense is reeds die afgelope week in die onluste dood.
Volgens die Suid-Afrikaner is die betogers in die stad lugtig nadat ’n gerug die rondte gedoen het dat die polisie opdrag het om van vandag af op hulle te skiet. “Ironies genoeg was daar verskeie voorvalle waar gewone misdadigers die situasie uitbuit. Hulle keer motoriste voor en beroof hulle dan van hul besittings as die motoriste nie vir hulle wil geld gee nie.
“Lagos is nie tans ’n lekker plek om te bly nie,” het hy gesê.
– Volg Nuus24 op Twitter
- Beeld