Nigerië: President besoek vloedslagoffers
2012-10-12 10:44
Lokoja – Goodluck Jonathan, president van Nigerië, het Donderdag duisende vloedslagoffers in die land besoek en die vloede as ‘n “nasionale ramp” beskryf.
Die Rooikruis het verlede maand berig dat 184 mense reeds in die vloede gesterf het en 64 000 dakloos gelaat is.
Jonathan het Donderdag die noordelike Kogi-provinsie besoek waar sowat 150 000 hektaar grond al vernietig is.
“Ons is verskriklik hartseer oor hierdie vloede in ons land. Dit is ‘n nasionale ramp,” het Jonathan tydens sy besoek gesê.
“Ons beraam nog planne hoe om almal terug in hul huise te kry na die vloede. Die regering doen alles wat hulle kan om die effekte vir julle te versag. Dit sal gou verby wees.”
Daar is sover nog geen effek gewees op olieproduksie nie, maar die kakao-industrie het verlede maand gesê dat hulle nie eens naby hul teiken van 300 000 ton kakao gaan kom nie.
“Ek het al my hoop in die lewe verloor omdat ek alles verloor het,” het Dan Musa Mosiji gesê, maar hy het bygevoeg dat hy gerusgestel is deur die regering se belofte dat hulle hervestig sal word.
“Ons grootste probleem op die oomblik is dat ons nie huisvesting het vir al die slagoffers nie,” het Jubril Ebiloma, ‘n Rookruis-amptenaar, gesê.
Nigerië se reënseisoen strek gewoonlik vanaf Maart tot September.
– Volg Nuus24 op Twitter
- Reuters
