Nigerië: Meisies uit 'kinderfabriek' gered
2012-04-13 14:12
Lagos – Die polisie in Nigerië het ‘n klopjag uitgevoer by ‘n onwettige weeshuis waar hulle jong meisies, wat glo gedwing is om kinders te hê met die doel om hulle te verkoop, gered het, het ‘n woordvoerder Vrydag gesê.
“Ons het die baba-fabriek in die Uruah-streek van die Akwa Ibom staat gevind tydens ‘n klopjag wat uitgevoer is nadat ons ‘n wenk ontvang het,” het assistent supt. Oyekachi Orji aan AFP gesê.
Sewe vroue tussen die ouderdomme van 18 en 20, insluitende drie wat swanger was, is uit die huis bevry tydens die klopjag op 4 April. Hulle het geen babas gevind nie.
Drie verdagtes, insluitend die eienaar, sy vrou en ‘n ander medepligtige, is in hegtenis geneem, het hy gesê.
“Die verdagtes lok gewoonlik jong meisies om swanger te word met die belofte van 70 000 naira (sowat R3 500) nadat hulle hul babas gehad het. Die babas word gewoonlik aan ritualiste verkoop,” het hy gesê.
Verskeie sulke “fabrieke” is in Nigerië ontdek en is soms daarop gemik om kinders aan paartjies te verkoop wat nie kan kinders hê nie.
Ander word vir prostitusie verkoop en soms word hulle gemartel of geoffer as deel van rituele vir toordery.
– Volg Nuus24 op Twitter
- Sapa - AFP
