Nigerië: 42 dood toe Christene, Moslems bots
2011-09-02 11:18
Kano – Minstens 42 mense is dood toe Christene en Moslems Donderdag in Jos, sentraal Nigerië, met mekaar gebots het, berig die nuusagentskap AFP.
Die twee groepe moes deur soldate uitmekaargedryf word.
Altesaam 22 Moslems en 20 Christene is volgens berigte in die voorval dood, maar die Nigeriese weermag wou nie die presiese dodetal bevestig nie.
Volgens ‘n beampte van ‘n reddingspan van die plaaslike Moslem-gemeenskap is die meeste slagoffers deur soldate doodgeskiet.
Die stad Jos word vir die afgelope paar jaar deur geweld tussen Moslem- en Christengroepe geteister.
“Die meeste van die slagoffers was tieners. Die oudste slagoffers was ‘n 60-jarige man wat in die kop geskiet is,” het Sabo Shuaibu, ‘n woordvoerder van die Jama'atu Nasril Islam-groep, ‘n oorkoepelende liggaam vir Nigeriese Moslems, gesê.
– Volg Nuus24 op Twitter.
- Sapa - AFP