Niger: Justisie-kantore lê in puin
2012-01-04 09:41
Niamey – Die kantoor van die departement van justisie in Niger is ernstig beskadig in 'n brand wat Dinsdagoggend uitgebreek het.
Die regering vermoed die brand is kwaadwillig gestig.
Die eerste verdieping van die gebou, waaronder die kantoor van die minister en sy assistente, is vernietig.
Die brandweer het ure gespook om die brand onder beheer te bring.
Ousmane Toudou, 'n woordvoerder vir die ministerie, het gesê die brand het omstreeks 04:00 begin.
“Alles is vernietig. Die argiewe en saakleêrs wat tans hanteer word, is alles vernietig,” het hy gesê.
Die regering van president Mahamadou Issoufou, wat sedert verlede jaar aan bewind is, is vasbeslote om korrupsie te beveg, veral onder landdroste.
“As hierdie brand verbind word aan die aksies wat ons onderneem om die regstelsel reg te ruk, dink ek dit was ‘n mislukking," het Marou Amadou, die minister van justisie, aan joernaliste gesê.
– Volg Nuus24 op Twitter.
– RSG
- Sapa - AFP