Navo sal nie gou weer êrens ingryp
2011-11-01 09:28
Tripoli – Die militêre operasies wat Navo sowat sewe maande gelede teen die diktatuur van kol. Muammar Gaddafi begin het, het Maandag amptelik ten einde geloop.
Luidens ’n verklaring van Navo het vliegtuie van verskeie Navo-lidlande – hoofsaaklik Frankryk en Brittanje – altesaam 26 300 vlugte onderneem, waarvan 9 600 gewapen was. Bykans 6 000 teikens is gebombardeer.
Amerika het, in teenstelling met vroeëre operasies, nóg polities nóg militêr ’n leidende rol gespeel. Die politieke leiding is deur Frankryk en Brittanje geneem, wat ook die grootste militêre rol gespeel het.
Amerika se militêre rol is ná die eerste drie of vier weke hoofsaaklik beperk deur logistieke steun. Amerikaanse tenkervliegtuie is gebruik om vliegtuie van ander lande in die lug van brandstof te voorsien, terwyl Amerika ook sy Europese bondgenote se ammunisietekorte gereeld aangevul het.
Dit vorm deel van pres. Barack Obama se buitelandse beleid om Amerika ’n meer beskeie internasionale rol te laat speel en ’n groter rol aan sy bondgenote oor te laat.
Die Libië-operasie het geïllustreer dat Europese state nie in staat is om ’n grootskaalse operasie van dié aard in eie krag te voer nie. Nie alleen moes Amerika die swaarste logistieke las dra nie, maar die Europese weermagte se begrotings is ernstig uitgehol, waardeur hulle op kort termyn veel meer as wat beplan is, moet besuinig.
Dit gaan ten koste van hul slaankrag. Dit is hoogs twyfelagtig of hulle op kort termyn nog ’n operasie soos dié sal kan bekostig.
Dit is waarskynlik een van die redes waarom pres. Basjir al-Assad van Sirië in die naweek die Weste uitgedaag het om die Libiese operasie teen sy land te herhaal.
Die finansiële krisis wat Europa tans teister, maak dit in elk geval uiters onwaarskynlik dat Navo op kort termyn weer op groot skaal êrens sal kan ingryp. En dus is die kans klein dat opstandelinge teen diktators soos Assad en ander op Navo se hulp kan reken.
– Volg Nuus24 op Twitter.
- Die Burger