Navo blits Tripoli voor Russiese besoek
2011-06-06 10:39
Tripoli – Navo-vegvliegtuie het die naweek Muammar Gaddafi se regeringsnetwerk erg laat deurloop onder lugaanvalle.
Dié aanvalle kom voor ‘n besoek deur ‘n Russiese verteenwoordiger vandeesweek aan die land, wat kommer oor die Westerse militêre veldtog skep.
Vyf kragtige ontploffings het Tripoli laat Sondagmiddag geruk ná drie vlae ontploffings vroeër die dag terwyl vegvliegtuie kruis en dwars oor die stad gevlieg het.
Die alliansie het Maandag in ‘n verklaring gesê hy het “intensiewe en aanhoudende aanvalle teen pro-Gaddafi-magte in Tripoli geloods.
“Ons sal aanhou om (Gaddafi se regime) te erodeer totdat die geweld teen die Libiese bevolking end kry,” het lt. genl. Charles Bouchard, hoof van die Navo-veldtog, in die verklaring gesê.
Mikhail Margelov, ‘n Russiese afgevaardigde, sou die Libiese rebellebasis in Benghazi Maandag besoek.
Rusland het sy kommer die naweek uitgespreek oor die Navo-veldtog, wat blyk om nou in die rigting van ‘n grondaanval te beweeg.
Brittanje het egter gesê hy sal hou by die Verenigde Nasies se Resolusie 1973, en nie magte op die grond ontplooi nie.
Volg Nuus24 op Twitter.
- Sapa - AFP