Namibiese man onskuldig bevind op moordklagte
2011-07-28 14:37
Windhoek – Justus Christian (Shorty) Erasmus, wat tereggestaan het op die moord op sy ouers en vyf van hul plaaswerkers, is Woensdagmiddag in die hooggeregshof in Windhoek op alle aanklagte onskuldig bevind, het die Republikein berig.
Regter-president Damaseb het Erasmus op agt aanklagte van moord en verdere aanklagte van huisbraak, roof, diefstal en die onwettige besit van vuurwapens onskuldig bevind.
Hy het gesê dat die staat nie bo redelike twyfel kon bewys dat daar ’n sameswering was met die hoofverdagte en selferkende massamoordenaar, Sylvester Beukes, en sy broer, Gavin Beukes, om die misdade te pleeg nie.
Erasmus (33) se medebeskuldigdes, Sylvester (26) en Gavin (29), is egter elk op die agt aanklagte van moord sowel as aanklagte van huisbraak met die doel om te roof, roof met verswarende omstandighede, dwarsboming van die gereg en die onwettige besit van vuurwapens en ammunisie, skuldig bevind.
– Kliek hier vir die volledige artikel.
– Volg Nuus24 op Twitter.
– Republikein