Namibië se eerste Mnr Gay-wenner aangerand
2011-12-09 14:31
Windhoek – ‘n Regtegroep vir gays het Donderdag die aanval op die wenner van Namibië se heel eerste Mnr Gay-kompetisie veroordeel.
Our-Right Namibia (ORN) “veroordeel die homofobiese aanval, wat polities gemotiveerd kan wees, op Wendelinus Hamutenya, die heel eerste Mnr. Gay Namibië.”
Hamutenya is Sondag in Windhoek deur twee mans op pad huis toe aangeval, het die organiseerders van die kompetisie gesê.
“Hy het aanklagte teen sy aanvallers aanhangig gemaak. Die mans het hom voorgekeer en gevra vir ‘die geld wat hy by die Mnr Gay-kompetisie gewen het’,” het Joe Gerstmayr, die besturende direkteur van Mnr Gay Namibië, Donderdag gesê.
Na ‘n kort stryery het een van die aanvallers vir Hamutenya geskop terwyl die ander verdagte sy selfoon en beursie gesteel het.
Hulle het hom met ‘n bottel oor sy kop, gesig en ribbes geslaan “waarna hy vir waarneming by ‘n privaatkliniek in Windhoek opgeneem is,” het Gerstmayr gesê.
Hamutenya beplan om aan aanstaande jaar aan die Mnr Gay Wêreld-kompetisie deel te neem. Dit gaan in April in Suid-Afrika aangebied word.
Namibië het nie enige wette teen gays nie en die grondwet verbied enige diskriminasie op grond van 'n persoon se seksuele oriëntasie.
– Volg Nuus24 op Twitter.
- Sapa - AFP
