Namibië: Gru-ongeluk eis 10
2012-01-04 15:29
Windhoek – Die teerpad tussen Okahandja en Karibib was Dinsdagmiddag besaai met verminkte lyke toe ten minste tien mense op slag dood is in een van die grusaamste padongelukke in onlangse tye, het die Republikein berig.
Die slagting het kort voor 17:00 sowat 28 km buite Okahandja plaasgevind toe ’n wit Nissan-sedan uit die rigting van Karibib ’n voertuig verbygesteek en ’n rooi dubbelkajuit Isuzu-bakkie skuins van voor getref het.
Die Nissan is weens die impak van die ongeluk in twee dele geskeur, met die een helfte wat links van die pad beland het en die ander helfte regs van die pad.
Die Isuzu het aan die brand geslaan, maar die vlamme is vinnig deur hulpverleners geblus wat by die ongelukstoneel stilgehou het.
Volgens Charlie Ellis van Kanaal 7 se Nuuslyn is dit een van die grusaamste tonele wat hy nóg gesien het.
“Mense se liggame is uitmekaar geruk. Niemand het die impak oorleef nie.”
– Lees die volledige artikel by die Republikein.
– Volg Nuus24 op Twitter.