NOR-beampte verdink van moord op generaal
2011-11-29 13:29
Tripoli – Libië se Nasionale Oorgangsraad (NOR) het Maandag beweer ‘n voormalige adjunk-premier van die NOR was moontlik betrokke by die moord op een van die rebelle-beweging se mees senior militêre beamptes.
Genl. Abdel Fattah Younes is in Julie deur iemand aan dieselfde kant as hy vermoor. Die voorval het verdeeldheid in die rebellie teen Muammar Gaddafi se regime veroorsaak.
Die bekendmaking van die verdagte kan verdere skeiding in die NOR tot gevolg hê.
Tydens ‘n nuuskonferensie wat op Libiese televisie uitgesaai is, het Yussef Al-Aseifr, die hoof militêre aanklaer van die NOR, vir Ali El-Essawi as die hoofverdagte uitgesonder.
Essawi het as die NOR se tussentydse adjunk-premier gedien voordat hy vroeër die jaar uitgetree het.
“Die nommer een verdagte in die ondersoek is die voormalige adjunk-hoof van (die NOR se) uitvoerende kantoor, Ali Abdelaziz Saad Al-Essawi,” het Aseifr gesê.
“Altesaam sewe mense word daarvan verdink dat hulle betrokke by die moord op Abdel Fattah Younes was. Drie is reeds in hegtenis geneem en veiligheidsmagte is op soek na die res.”
– Volg Nuus24 op Twitter.
- Reuters