Mugabe vaar uit oor Gaddafi se dood
2012-09-27 08:15
New York – Pres. Robert Mugabe van Zimbabwe het Woensdag tydens 'n toespraak in die Verenigde Nasies se Algemene Vergadering teen die VSA, die VN en Navo uitgevaar oor die manier waarop die Libiese leier, Muammar Gaddafi, dood is.
Hy het onder andere gesê Gaddafi se dood is net so tragies soos die dood van die Amerikaanse ambassadeur vir Libië, Christopher Stevens. Stevens is dood ná 'n groep ekstremiste die Amerikaanse konsulaat in Benghazi aangeval het uit woede oor 'n Amerikaans-vervaardigde rolprent wat die spot met Islam dryf.
Die 88-jarige staatshoof het die VSA daarvan beskuldig dat hy "gejaag het om olie uit Irak te suig" toe die land in 2003 binnegeval is.
Hy het gesê die VN se Veiligheidsraad is "misbruik" deur "al die nodige maatreëls" in plek te stel vir die militêre ingryping in Libië wat Muammar Gaddafi uiteindelik ontsetel het.
Mugabe het sy toespraak geopen deur sarkasties te verwys na die "hartroerende" manier waarop pres. Barack Obama van die VSA aan Stevens hulde gebring het.
"Ek is seker ons is almal geroer, ons almal stem saam dat dit 'n tragiese sterfte was en ons veroordeel dit," het Mugabe gesê.
"Terwyl ons in ons gees saam met die VSA hierdie sterfte veroordeel, sal die VSA ook saam met ons die barbaarse dood van die staatshoof van Libië, Gaddafi, veroordeel? Dit was 'n verlies, 'n groot verlies, vir Afrika, 'n tragiese verlies vir Afrika."
"Die dood van Gaddafi moet gesien word in dieselfde tragiese lig as die dood van Chris Stevens. Ons veroordeel albei sterftes," het hy bygevoeg.
– Volg Nuus24 op Twitter.
- Reuters
