Mugabe se vrou eis R105 m. van koerant
2010-12-17 11:48
Harare – Robert Mugabe se vrou eis $15 miljoen (sowat R105 miljoen) van ’n koerant oor ’n WikiLeaks-berig dat sy geld uit onwettige diamante gemaak het.
The Standard het verlede week ’n telegram gepubliseer wat James McGee, Amerikaanse ambassadeur, in 2008 aan Washington gestuur het waarin staan Grace Mugabe het miljoene verdien uit die onwettige ontginning van diamante in die Marange-gebied.
“Beskuldigings teen die moeder van die nasie tas die respek wat alle verstandige mense vir haar het aan,” lui die dagvaarding.
George Chikumbirike, haar prokureur, het gesê die berig het haar verkeerdelik as korrup uitgebeeld deur te beweer dat sy haar posisie misbruik om diamante onwettig te bekom en haar te verryk terwyl die land ’n erge geldtekort ervaar.
– Sapa-AFP