Mugabe 'sal mag oorgee'

2012-07-25 07:37

Wellington – Morgan Tsvangirai, MDC-leier en Zimbabwiese premier, het gesê die land se leier, Robert Mugabe, is gereed om mag oor te gee indien hy die volgende verkiesing verloor.

Tsvangirai het Woensdag dié uitlatings tydens sy besoek in Nieu-Seeland gemaak. Hy besoek verskeie lande in 'n poging om beperkte sanksies teen Zimbabwe te beëindig.

Hy het gesê hy is vol vertroue dat vrye verkiesings binne 12 maande gehou sal word en dat Mugabe "die uitslag sal aanvaar".

Tsvangirai was tydens die verkiesing in 2008, wat gekenmerk was deur geweld, 'n presidentskandidaat. Mugabe en Tsvangirai het later 'n magsdelingsooreenkoms onderteken.

– Volg Nuus24 op Twitter

- Sapa - AP