Mugabe praat nie oor gay-regte
2010-03-27 04:55
Harare – President Robert Mugabe het gesê hy sal nie die kwessie van gay-regte wat in Zimbabwe se nuwe grondwet ingeskryf moet word, bespreek nie.
Dié land se koalisie-regering met pres. Mugabe en premier Morgan Tsvangirai sal binnekort deelneem aan nasionale gespreksforums oor die samestelling van die nuwe grondwet.
Die opstel van ‘n nuwe grondwet wat meer op die burgers van die land sal fokus is deel van ‘n reeks demokratiese veranderinge wat in dié land aangebring sal word.
Volgens die Herald-koerant, wat deur Mugabe se ministerie van inligting beheer word, het hy reeds sekere voorstelle ontvang om gay-regte by die nuwe grondwet in te sluit
“Dit kan nie bespreek word nie,” het Mugabe glo gesê.
“Die mense wat dit wil bespreek is mal. As ons daaroor praat sal die dooies teen ons opstaan,” het hy bygevoeg.
Zimbabwe is een van die Afrika-lande waar homoseksualiteit nie goedgekeur word nie. Robert Mugabe is vroeër aangehaal waar hy gesê het dat gay-persone “erger as honde en varke is”.
Ten spyte van Mugabe se teenstand het Zimbabwe geen wette wat gay-huwelike verban nie.
Tsvangirai en sy beweging vir demokratiese verandering (MDC) meen dat homoseksualiteit ‘n private kwessie is en dat dit nie as ‘n misdaad bestempel kan word nie.
– Sapa, dpa