Mugabe plaas druk op sy teenstanders
2011-06-02 17:01
Harare - Die Zimbabwiese president, Robert Mugabe, se party, Zanu-PF, het die druk op sy teenstanders verhoog met 'n veldtog vir 'n verkiesing vanjaar.
Nadat Zanu-PF blykbaar gehoor gegee het aan druk in die streek, het die party begin terugveg met 'n politieke strategie wat die opposisie paniekbevange maak.
Mugabe het gesê sy party is gereed om grondwetlike hervormings deur te voer, vóór verkiesings vanjaar.
Hy hou egter vol dat teenstanders nie toegelaat sal word om dít te gebruik om 'n verkiesing te vertraag, óf sy omstrede nasionaliseringsprogram te ontspoor nie.
Die eerste minister, Morgan Tsvangirai, het gesê hy glo sy MDC sal die volgende regering vorm en Mugabe onttroon ná dertig jaar aan bewind, indien 'n vrye en regverdige verkiesing gehou word.
- Volg Nuus24 op Twitter.
- RSG