Mugabe kanselleer VN-besoek
2011-10-26 21:43
Harare – President Robert Mugabe van Zimbabwe het ‘n besoek na Genève vir ‘n vergadering van die Verenigde Nasies gekanselleer nadat sy vrou en senior beamptes visums geweier is, het staatsmedia Woensdag berig.
Westerse lande, insluitend Amerika en die Europese Unie, het meer as ‘n dekade gelede reis- en finansiële-sanksies teen Mugabe en senior beamptes van ZANU-PF ingestel.
Dié reisverbod is ingestel weens beskuldigings van die misbruik van regte en verkiesingsknoeiery.
Die sanksies, wat Mugabe reken is ‘n straf vir sy grondeiswet, geld normaalweg nie vir vergaderings wat deur die VN gereël word nie.
Woensdag het The Herald berig dat Mugabe die besoek na Switserland vir die beraad van die Internasionale Telekommunikasie Unie (ITU) gekanselleer het nadat Grace, sy vrou, Simbarashe Mumbengegwi, die minister van buitelandse sake, George Charamba, die hoofwoordvoerder, en drie ander senior beamptes reispermitte geweier is.
Die Zimbabwiese regering het ‘n klagte by die Switserse regering en by die Verenigde Nasies aanhangig gemaak.
Mugabe se woordvoerder was nie dadelik vir kommentaar beskikbaar nie.
– Volg Nuus24 op Twitter.
- Reuters