Mugabe is nie siek nie - Zanu-PF
2011-01-19 14:10
Kaapstad - Zimbabwe se Zanu-PF het bewerings dat die land se president, Robert Mugabe, siek is en behandeling ontvang in Malesië, as ongegrond afgemaak.
'n Berig in die Britse Daily Telegraph het Maandag beweer dat Mugabe hom in Maleisië bevind ná 'n prostaat-operasie.
Rugare Gumbo, woordvoerder van ZANU-PF, het in 'n onderhoud met Nuus24 bevestig dat die berigte op bespiegeling gebaseer is.
“Dit is bespiegeling. Daar is mense wat die president doodwens en hulle dink dis 'n goeie manier om hom skade te berokken. Die waarheid is dat die preseident elke jaar verlof neem. Hy gaan elke jaar na Maleisië vir Kersfees en Nuwejaar. Sovêr ons weet is hy steeds daar en ons weet niks van 'n operasie nie,” het Gumbo gesê.
'Ernstige' operasie
Gumbo het gesê Zanu-PF is nie verbaas om van die bewerins te hore te kom nie omdat dit 'n gewoonte by die media geword het om sulke berigte te publiseer elke keer wat “die president verlof neem”.
“Hierdie berigte kom elke jaar uit want daar is mense wat graag 'n verandering in die politieke bestel wil sien en wat daarom net die slegste vir die president wens. Hulle wens hom dood. Wat verbasend is, is dat hulle altyd hierheen kom en hom sien, en sê hy lyk gesond vir sy ouderdom, maar dan versin hulle al hierdie vals nuus oor sy gesondheid," het Gumbo gesê.
Gumbo se reaksie het ooreengekom met dié van Mugabe se woordvoerder, George Charamba, wat volgens berigte ook ontken het dat die president siek is. Hy het vir die Zimbabwiese koerant Newsday gesê dat Mugabe op sy "jaarlikse verlof" in Maleisië is, en dat hy binnekort na Zimbabwe sal terugkeer.
Volgens Daily Telegraph het diplomatieke bronne gesê dat Mugabe, 86, “'n ernstige operasie ondergaan het ná sy prostaat weer begin pla het". Die berig in Daily Telegraph het ook gesê dat daar “binne sy Zanu-PF-party vertroue is dat hy binne 'n week sal terugkeer huis toe en ten volle sal herstel”.
Weermag 'op gereedheidsgrondslag'
Intussen het die Cape Times Woensdag berig dat die Zimbabwiese weermag Dinsdag op gereedheidsgrondslag geplaas is “te midde van onsekerheid oor die gesondheid van Robert Mugabe”.
Volgens die Cape Times is dit moontlik dat Mugabe “erg deur dié groot operasie geraak kan word" en dat hy "dalk nooit weer ten volle as president sal kan funksioneer nie”.
Mugabe het in die verlede bewerings oor sy gesondheid ontken. Tydens 'n vergadering met Zimbabwiese redakteurs het hy gesê: “Ek weet nie hoeveel keer ek sterf nie, maar niemand het al ooit van my opstanding gepraat nie. Ek neem aan hulle wil nie, want dit sal beteken hulle moet 'n hele paar keer oor my opstanding berig, en dit sal nogal 'n goddelike prestasie wees vir iemand wat nie goddelik is nie. Jesus is een keer dood, en het net een keer opgestaan, en arme President Mugabe 'n paar keer. My tyd sal kom, maar vir eers nie.”
- Volg Nuus24 op Twitter
- Nuus24