Mugabe: Moenie weer stem vir koalisieregering
2012-10-19 16:53
Kaapstad – Zimbabwiërs het in die laaste vier jaar gesien wat ‘n disfunksionele regering doen, het president Robert Mugabe gesê, en het kiesers aangeraai om wys te stem.
Die 88-jarige president het Vrydag aan inwoners in Hwange gesê hulle moet verseker dat die land nie weer ‘n koalisieregering het nie, het The Herald Online berig.
Mugabe het gesê dat die koalisieregering wat hy in 2008 saam premier Morgan Tsvangirai gevorm het, het heeltemal misluk.
Hy het gesê dat die onmin en bakleiery in hul koalisieregering het nou so erg geraak, dat dit moeilik is om ontwikkelingsprogramme te implementeer.
“Ons het gesien hoe Bulawayo se ekonomie ineengestort het. Ons sien hoe die landbousektor geen geld het nie. As jy na die minister van finansies Tandai Biti gaan dan sê hy net altyd dat daar nie geld is nie. As daar nie geld is nie, wat doen jy om dit te kry?” het Mugabe gesê.
“Party mense kom na jou toe en sê dat Zanu-PF nie goed is nie. Ons soek ontwikkeling en vordering, maar party mense soek net plesier.”
Mugabe het bygevoeg dat die mense wat eens die land wou verander stel nou net belang om vroue te verander. Mugabe het hierdeur dalk verwys na Tsvangirai, wie se reputasie die afgelope tyd ‘n harde knou beleef het weens sy verhoudings.
“Ons gaan verkiesing hou en julle het nou gesien wat ons land nooit weer moet doen nie.”
“Asseblief moet ons nie weer in daardie situasie kry nie. Dit is nie die manier hoe om goed te doen nie.”
“Dit is hoekom ek op hierdie ouderdom nog baklei en ek sal aanhou baklei want ek kan nie die helde van die verlede in die steek laat nie. Ek het ‘n verantwoordelikheid teenoor julle.”
– Volg Nuus24 op Twitter
