Mubarak-verhoor: Oud-intelligensiehoof getuig
2011-09-13 19:58
Kaïro - Een van die mees geheime figure in die voormalige Egiptiese president, Hosni Mubarak, se binnekring het Dinsdag in die voormalige president se moordverhoor getuig.
Alle media is die hof verbied terwyl Omar Suleiman vrae sou beantwoord oor of Mubarak hom beveel het om betogers tydens die opstande in Egipte te vermoor.
Suleiman, wat as vir jare as Mubarak se intelligensiehoof gedien het en as vise-president aangewys is in die laaste week van die president se regime, is die eerste van ‘n string lede van Mubarak se mees senior leierskap wat in die hof sal getuig. Egipte se militêre leier, wat as Mubarak se minister van verdediging gedien het, sou Sondag getuig, maar het nooit by die hof opgedaag nie.
Dit is die eerste keer in die land se geskiedenis dat ‘n hof figure in die geheime militêre- en intelligensiedienste ontbied om in ‘n saak te getuig.
Die 83-jarige Mubarak, sy voormalige minister van binnelandse sake en ses senior polisiebeamptes staan onder meer tereg op aanklag van moord vir die dood van betogers tydens die 18 dae lange opstande in Februarie wat tot Mubarak se val gelei het.
Die hofsaak draai om die vraag of Mubarak sy binnelandse minister, Habib el-Adly, beveel het om dodelike geweld teen betogers te gebruik en of hy enige stappe gedoen het om bloedvergieting te voorkom.
– Volg Nuus24 op Twitter.
- AP