Mubarak-saak word uitgestel
2011-10-31 09:00
Kaïro – Hosni Mubarak, die voormalige president van Egipte, se hofsaak is met twee maande uitgestel na 28 Desember, het AP berig.
Die hofsaak het sowat drie maande gelede begin. Die langdurige uitstel is veronderstel om vir ‘n ander hof die kans te gee om te besluit of die paneel van drie regters in Mubarak se saak vervang moet word.
Dié beslissing word op 3 November verwag.
Mubarak word daarvan aangekla dat hy die bevel gegee het dat betogers doodgemaak moet word. Sy twee seuns, Gamal en Alaa, word ook van korrupsie aangekla en Mubarak se voormalige minister van binnelandse sake, Habib al-Adly, en ses voormalige polisiebevelvoerders word saam met hom van moord aangekla.
Hulle word almal apart verhoor, maar die sake word deur dieselfde regter hanteer.
Indien Mubarak skuldig bevind word, kan hy die doodstraf kry.
Mubarak het op 11 Februarie, ná ‘n 18 dae lange opstand, die tuig neergelê.
– Volg Nuus24 op Twitter.
- Sapa - AP