Woede bars los ná Mubarak se toespraak
2011-02-10 23:56
Kaïro – President Hosni Mubarak het die Egiptiese nasie toegespreek en weereens bevestig dat hy nie sal deelneem aan die September-verkiesings nie.
Hy is egter vasbeslote om in Egipte te bly.
"Ek sal nie die land verlaat totdat ek dood en onder die grond begrawe is nie," het hy tydens sy toespraak gesê.
Intussen het Mubarak aangekondig dat hy mag en verantwoordelikheid aan sy adjunk-president, Omar Suleiman, sal delegeer.
Die skare, wat stil was tydens die president se toespraak, het in woede uitgebars en selfs skoene deur die lug geswaai.
Die betogers vergader al vir die afgelope twee weke op Tahrir-plein in protes teen Mubarak se regime.
Adjunk-president praat met skare:
Sowat 'n halfuur ná Mubarak se toespraak het adjunpres. Suleiman ook met die skare gepraat. Hy het betogers aangemoedig om terug te keer na hulle huise en werke.
"Ons het nou nodig dat julle terugkeer na julle werk," het Suleiman gesê.
Hierdie woorde het skare se woede kookpunt laat bereik.
Kundiges het Donderdagaand gewaarsku dat Mubarak se nuutste optrede chaos tot gevolg kan hê.
Volg Nuus24 op Twitter.