Mosambiek herroep verhoogde broodprys
2010-09-07 17:45
Maputo – Die Mosambiekse regering het die verhoging op brood- en waterpryse, wat tot gewelddadige protesoptogte gely het, herroep.
Verlede week het protesoptogte weens die verhoging in brood-, water- en elektrisiteitspryse, 13 lewens geëis.
Aiuba Cuereneia, minister van beplanning en ontwikkeling, het aangekondig dat die 20% verhoging wat die regering op die broodprys gehef het, herroep sal word.
Hy het gesê dat die verhoogde waterprys ook herroep sal word, maar dat die verhoogde elektrisiteitsprys sal bly.
“Hierdie stappe word geneem om die lewenskostes van mense wat in Mosambiek woon, te verlaag,” het die minister gesê.
Cuereneia het ook aangekondig dat top-regeringsamptenare nie meer hul beplande salarisverhogings sal ontvang nie.
Salaristoelae aan diegene wat as voorsitters dien op die rade van publieke maatskappye sal ook vir eers uitgestel word.
Volg Nuus24 op Twitter.