Mosambiek bied 'nuwe geleentheid' vir SA boere
2010-11-25 14:10
Xai-Xai - Suid-Afrikaanse boere wat graag in Mosambiek wil belê, is welkom om hul landboukennis in dié land te gebruik.
Dié uitnodiging is tydens 'n landboukonferensie in die Mosambiekse kusstad Xai-Xai aan Suid-Afrikaanse boere gerig, berig Sapa.
Ongeveer 100 Suid-Afrikaanse boere het die konferensie bygewoon, wat gereël is deur die Suid-Afrikaanse hoë kommissariaat in Mosambiek.
Die hoë kommissariaat het die konferensie gereël om beleggingsgeleenthede vir Suid-Afrikaners te skep en om diplomatieke bande met Mosambiek te verbeter, het Dikgang Moopeloa, die Suid-Afrikaanse hoë kommissaris in Mosambiek, aan Sapa gesê.
Raimundo Maico Diomba, 'n Mosambiekse provinsiale goewerneur, het Suid-Afrikaanse boere se tegniese kundigheid verwelkom.
"Vanuit hierdie forum hoop ons om die ryk ervaring van Suid-Afrika te bring om die landbou in Mosambiek te verryk," het hy gesê.
Slegs 12% van die 36 miljoen hektaar potensiële landbougrond in Mosambiek word tans deur boere benut.
"Ons is baie opgewonde om die mense van Mosambiek van bekostigbare voedsel te voorsien," het Charl Senekal, 'n Suid-Afrikaanse boer, tydens die konferensie gesê.
"Boere wat wil diversifiseer of wat hul plase weens die herverdeling van grond verloor het, het 'n nuwe geleentheid in Mosambiek," het hy gesê.
- Volg Nuus24 op Twitter