Mosambiek: Vrou deur seuns verkrag as 'straf'
2012-02-09 14:33
Maputo – ‘n Vyf-en-dertigjarige vrou is verkrag toe sy deur ‘n veld in die noorde van Mosambiek gestap het waar ‘n groep tienerseuns aan 'n besnydenisritueel deelgeneem het.
'n Tradisionele leier wat die seremonie uitgevoer het, het haar daarvan beskuldig dat sy grond betree het waar vroue nie toegelaat word nie, en hy het 17 van die seuns beveel om haar as "straf" te verkrag.
Vier van die jeugdiges is in hegtenis geneem, maar geen verhoordatum is al vasgestel nie, het Delfino Jose van Mosambiek se eenheid vir misdaad teen vroue aan AFP gesê.
In Mosambiek word baie hofsake bloot geskrap en vind ‘n verhoor nooit plaas nie.
Die voorval het ‘n hewige debat ontlok oor vroue en tradisie in ‘n land wat geloof word vir die manier waarop vroue in die politiek betrek word.
Die voormalige eerste minister en huidige hoof van die parlement is vroue, sowel as 39% van die land se wetgewers.
Mosambiek het ook die African Gender-toekenning gewen vir die bevordering van vroue in 2009.
– Volg Nuus24 op Twitter
- AFP