Moordondersoek begin teen Gaddafi se seun
2011-10-13 11:59
Tripoli – Libië se tussentydse regering het sy toestemming gegee dat ‘n ondersoek geopen kan word na die rol wat Muammar Gaddafi se seun, Saadi, gespeel het in die dood van ‘n sokkerspeler wat vir die nasionale span in die 1980’s gespeel het.
Dié aankondiging is Woensdag deur Abdullah Banoun, die aanklaer, gemaak.
Banoun het tydens ‘n roudiens gesê die Nasionale Oorgangsraad (NOR) het ingestem dat ‘n ondersoek na die dood van Basheer Al-Rryani, ‘n voormalige middelskakel en afrigter, kan voortgaan.
Al-Rryani is in Desember 2005 gemartel en vermoor.
Tydens die Gaddafi-era was daar nie ‘n onafhanklike regsbank nie en geen poging is gemaak om die rol van Saadi Gaddafi by die moord te ondersoek nie. Interpol het onlangs ‘n lasbrief vir Saadi se inhegtenisname uitgereik, het die aanklaer gesê.
Na die opstand in Libië het Saadi skuiling in Niger gaan soek, waar hy deur die regering dopgehou word.
Saadi word daarvan beskuldig dat hy militêre eenhede gelei het om die betogers gewelddadig te onderdruk en dat hy eiendom onwettig aangekoop het.
– Volg Nuus24 op Twitter.
- Reuters