Minstens 50 sterf in gevegte in Nigerië
2012-01-01 12:07
Lagos – Minstens 50 mense is Saterdag dood in gevegte tussen twee buurgemeenskappe in Nigerië se suidoostelike Ebonyi-staat, het ‘n woordvoerder van die regering gesê.
“Minstens 50 mense is dood toe ‘n groep mense van die Ezza-gemeenskap inwoners van die Ezilo-gemeenskap aangeval het oor ‘n dispuut oor grond,” het Onyekachi Eni aan AFP gesê.
Die gevegte word nie verbind met aanvalle deur die Boko Haram Islamitiese sekte nie, het hy bygevoeg.
“Die dispuut tussen die twee gemeenskappe, wat in 2008 begin het, was uitgewerk totdat dit nou weer opgevlam het. ‘n Groep mense van Ezza het Ezilo binnegeval en hulle aangeval. Hulle het meer as 50 mense daar doodgemaak,” het hy gesê.
Die goewerneur van Ebonyi, Martin Elechi, en die hoof van die staatpolisie het die toneel Saterdag besoek, het Eni, die goewerneur se woordvoerder, gesê.
Tientalle polisiebeamptes is na die twee gemeenskappe ontplooi om reg te laat geskied, het hy bygevoeg.
Gewelddadige en dodelike gevegte oor land vind gereeld in Nigerië plaas tussen naburige gemeenskappe aan die een kant en tussen boere en veewagters aan die ander kant.
Die eienaarskap van grond is ‘n sensitiewe kwessie onder meeste Nigeriërs, aangesien kommersiële of tradisionele waardes daaraan geheg word.
– Volg Nuus24 op Twitter
- Sapa - AFP