Minister rig 'waarskuwing' oor Zim-verkiesing
2012-10-17 17:54
Kaapstad – Patrick Chinamasa, Zanu-PF se onderhandelaar en minister van justisie in Zimbabwe, se roekelose uitlatings dat sy party en die weermag dit nie sal aanvaar as premier Morgan Tsvangirai die verkiesing wen nie, moet as waarskuwing vir die MDC dien.
Politieke ontleders sê Chinamasa se uitlatings roekeloos en toon geen respek vir die landswette nie, het NewsDay berig.
Chinamasa het in ‘n onlangse onderhoud met die BBC gesê Tsvangirai sal nie volgende jaar se verkiesing wen nie, en dat sy oorwinning in elk geval onaanvaarbaar sal wees.
Alex Magaisa, ‘n politieke ontleder, het gesê Chinamasa se uitlatings dui daarop dat volgende jaar se verkiesing ‘n herhaling kan wees van die verkiesing in 2008, toe meer as 200 mense tydens verkiesingsgeweld dood is.
“Chinamasa impliseer dat die mense van Zimbabwe so kinderagtig is dat hulle nie hul eie politieke besluite kan neem nie. Hy impliseer dat die mense moet staat maak op die wysheid van Zanu-PF om te sê vir wie hulle moet stem.”
Pedzisayi Ruhanya, nóg ‘n politieke ontleder, voel egter dat Chinamasa nie ernstig opgeneem moet word nie.
“Chinamasa maak net geraas. Hy het nie mag nie en ek dink nie Zanu-PF sal mense kan keer om te stem vir wie hulle wil nie.”
– Volg Nuus24 op Twitter
