Minister foutiewelik aangehou
2009-10-07 09:59
Kampala – Die aanhouding van Somalië se minister van verdediging gedurende ‘n besoek aan Uganda is ‘n misverstand en daar word verwag dat hy later Woensdag vrygelaat sal word, het ‘n woordvoerder van die weermag in Uganda gesê.
“Hy gaan verseker vandag vrygelaat word,” het luitenant-kolonel Felix Kulayigye gesê.
“Ons het eintlik inligting gehad dat daar ‘n Somaliese opstandeling oppad was en natuurlik, met die Oos-Afrikaanse sekuriteitskonferensie en onafhanklikheidsdag wat beide hierdie week plaasvind, is daar baie hooggeplaastes in die stad en ons moet op ons hoede wees,” het hy verduidelik.
“Ons het inligting ontvang dat hierdie man van Somalië Uganda binnegekom het en ons het ondersoek begin instel. Ons het hom opgevolg. Nadat hy in hegtenis geneem is, is hy geïdentifiseer as ‘n minister en hy sal vandag (Woensdag) vrygelaat word,” het hy bygevoeg.
Youssuf Mohamed Siad, die minister van verdediging, het Uganda met ‘n voertuig vanaf Kenia binnegegaan, het Kulayigye gesê.
“Hy moes tog met ‘n vliegtuig gekom het. Hy moes ons ingelig het en as ‘n reisende buitelandse amptenaar gekom het,” het hy gesê.
James Mugira, die hoof van Uganda se millitêre intelligensiedienste, het gesê dat Youssuf Mohamed Siad “opgetel is as veiligheidsmaatreël deur Uganda se staatsekuriteit.”
- Sapa - AFP