Minister: Libië verwag AU-ondersteuning
2011-06-30 08:53
Malabo - Die Libiese minister van Afrika Unie-sake het Woensdag gesê Muammar Gaddafi, die leier van Libië, se regering verwag ondersteuning van die kontinentale organisasie by sy komende beraad in Ekwatoriaal-Guinee.
“Ons het gekom sodat die Afrika Unie ons posisie kan ondersteun en sodat die posisie van Afrika sterk kan wees,” het Joma Ibrahim Amer gesê. Die konflik in Libië is ‘n top-prioriteit op die agenda van die beraad, wat Donderdag begin het.
“Afrika se posisie is duidelik en is in die padkaart opgesom wat deur Libië aanvaar is,” het hy gesê in verwysing na ‘n plan wat in Maart bekend gemaak is om die oorlog tussen Gaddafi-magte en rebelle te bëeindig.
Die rebelle, wat ook ‘n gesant na die beraad gestuur het, het gesê hulle sal slegs die plan aanvaar as dit beteken Gaddafi bedank as leier.
“Hierdie padkaart is ‘n belangrike stap vir ‘n vreedsame oplossing, maar die bomaanvalle deur Navo, die lande wat deel van die alliansie is, gaan moet stop. Hulle teiken burgerlike instansies soos skole en hospitale en dood sodoende menigte burgers,” het Amer gesê.
- Volg Nuus24 op Twitter.
- Sapa - AFP