Miltsiekte maai onder Uganda-seekoeie
2010-08-19 10:15
Kampala – Antraks of miltsiekte het die lewe van minstens 83 seekoeie geëis in een van Uganda se gewildste nasionale parke.
Daar was ses jaar gelede ’n soortgelyke uitbreking, het Tom Okello, bewaringsbestuurder van die Queen Elizabeth- nasionale park in die suidweste van die land, gesê.
Okello is in Junie ingelig oor die huidige uitbreking toe tien seekoeie skielik binne ’n halwe dag dood is weens dié spoorvormende bakterieë.
Hy het gesê personeel het geleer uit hul ondervinding in 2004 toe meer as 300 seekoeie gevrek het, en het die situasie nou byna onder beheer gebring.
Die antraks kom van bakterieë in die grond rondom ’n klein meer in die park.
Wild kan dit opdoen as hulle oop sere het, en aasvoëls en roofdiere kan dit verder versprei. Volgens Okello is die siekte baie ver van enige toeristegebiede.
Volg Nuus24 op Twitter.
- Sapa - AFP