Mielies goedkoper in VSA as Oos-Afrika
2011-08-17 14:32
Berlyn – Die hongersnood in die Horing van Afrika is mensgemaak en is 'n gevolg van kunsmatige hoë pryse vir voedsel én burgeroorloë, het Wolfgang Fengler, die Wêreldbank se hoofekonoom, gesê.
“Die krisis is mensgemaak. Droogtes gebeur oor en oor maar jy het swak beleid nodig vir ‘n droogte om na hongersnood te lei,” het hy gesê.
Sowat 12,4 miljoen mense in die Horing van Afrika, wat Somalië, Kenia, Ethiopië en Djiboeti insluit, word deur die ergste droogte in dekades geraak, volgens die Verenigde Nasies. Duisende mense is reeds weens die droogte dood.
Fengler het gesê die prys van mielies in die ooste van Afrika is aansienlik hoër as in die res van die wêreld as gevolg van beheer oor die plaaslike voedselmarke.
“In Kenia is die prys van mielies van 60% tot 70% bo die gemiddelde internasionale prys. ‘n Klein hoeveelheid boere het beheer oor die mark, wat die pryse kunsmatig hoog maak.”
Die Wêreldbank het gesê dat die Voedselprys-indeks in Julie 33% hoër was as ‘n jaar gelede.
“Mielies is goedkoper in Amerika en Duitsland as wat dit in die ooste van Afrika is,” het Fengler gesê.
– Volg Nuus24 op Twitter.
- Reuters