Meer regte vir Malawiese sekswerkers
2009-10-23 11:42
Lilongwe – Malawië is besig om ’n wet voor te berei wat sekswerkers teen mishandeling sal beskerm.
Dié wetvoorstel sal glo baie doen om MIV/Vigs te help bestry, wat 'n enorme probleem is in die suide van Afrika.
Omtrent 800 000 Malawiërs is sedert 1984 dood aan MIV/Vigs.
Patricia Kaliati, Malawiese minister van inligting, het aan die media gesê dat die wetsontwerp gefinaliseer moet word voordat dit in die parlement goedgekeur kan word.
“Ons wil hulle van die strate af kry, hulle toelaat om seks binne hul huise te hê en hulle beskerm teen mishandeling en Vigs,” het Kaliati gesê.
Sy kon nie verduidelik presies hoe die wet dit sal regkry nie, maar sy het ontken dat die regering prostitusie wettig wil maak.
Menseregte-aktiviste het die regering gewaarsku daarteen om prostitusie wettig te maak, maar Kaliati het aangedring daarop dat die wetgewing bloot daar sal wees om sekswerkers se regte te beskerm.
“. . .ons wil dié weerlose groep mense teen mishandeling beskerm,” het sy gesê.
- Reuters